同尖沙咀一站之隔嘅佐敦，有唔少地道又好味嘅餐廳，絕對係平民嘅美食寶藏呀！所以我哋好多時候喺尖沙咀行完街睇完戲之後，都會行嚟佐敦搵嘢食。今晚想食港式小菜，一於試吓老點里，睇吓M佬會唔會老點你啦！
豬油渣炒菜心苗
豬油渣炒菜心苗絕對係80年代名菜，依家真係好少見。製作豬油渣一啲都唔簡單，絕對係體現廚師嘅功夫。至於「老點里」嘅廚師就無老點我哋喇，菜心苗相當新鮮，配上油香十足嘅豬油渣，清碟冇難度。
辣酒煮花螺
一上枱就聞到陣陣嘅酒香，真係夠晒醉人！花螺份量唔少，而且相當彈牙，味道帶有辣酒嘅辛辣，非常醒胃。
泰式胡椒雞中翼
有菜又有海鮮，晚餐唔叫個肉好似漏咗啲嘢咁。今日想食啲香口嘢，所以就叫泰式胡椒雞中翼啦！雞中翼以泰式胡椒調味，非常入味，又唔會太辣。
